北海道之旅 2017 （DAY 5 富良野北之峰民宿

12月 29, 2017

北海道之旅 2017 （DAY 5 富良野北之峰民宿－紅磚牆木屋)

之前做overseas pre-wedding化妝工作，又或者同朋友、公司同事去旅行，
都有住過各種大大小小既民宿，我比最高分既莫過於位於大阪日本橋一間3層既屋，有機會都想分享返😂

而且係外國買當地新鮮平靚正既食材煮，的確係一種情趣，感覺很不錯！

所以都好嚮往可以同李生一齊體驗下，趁住呢個上山學滑雪既機會，就book左位於富良野北之峰的Brick House

講返專程走過黎道央既原因，就係未玩過滑雪既我地，
都好想感受一下呢種同奧妙既大自然融合既運動😂😂

有朋友推薦過札幌附近既滑雪場，如Kiroro、盤溪
咁我就膽粗粗請教左一位每年年初都會過去北海道既滑雪教練，佢反而推薦星野同富良野，基於我地會去美瑛，最後就揀左後者～

佢除左分享各種滑雪資訊，仲介紹左d景點同餐廳，確實不往此行，真係多謝晒呀！🙇😄

由美瑛搭JR去富良野，半小時就到了～

一出站，就望到對面山頭既滑雪場
而富良野滑雪場分左"富良野"同"北之峰"兩區，兩個地區相隔10分鐘車程；
前者有可以ski-in／ski-out既王子大飯店； "北之峰"亦有其他酒店，而民宿區都係位於呢一邊的

我地將行李寄存左係車站locker後，就去食富良野著名既KUMAGERA生牛肉飯

果然係好好食，食唔返點算啊😭😭😭😂

炸豬排好鬆軟，亦好重量級👍

另外仲點左生啤，咁既質素，埋單先3600yen😱

食完lunch後就出發去買今晚既餸菜（哈！最鐘意做師奶😛）
上網搵左最近既超市係差不多1公里以外既CO-OP😨
..........問李生即係行幾耐，佢話由太子去油麻地啊，15分鐘啦😓

聽落唔係好遠，但係冰雪地拎住個唔輕既袋行，尤其是過馬路時，真係一步一驚心呀😱😭
仲要好～～凍～～又唔敢雙手插衫袋，一陣跣低左容都毀埋點算😤
最後～終於見到大大塊綠色招牌！好感動呀！！！💪💪💪😭😭😭
果然好體驗到當地人生活呀下（事實上佢地個個都揸車架😝）

CO－OP 位置在油站隔離，外面都有個大型停車場，附近亦有幾間類似便利店同生活百貨商鋪，相信呢到係當地居民主要既生活補給站

急不及待入去取暖，樓下係超市，樓上亦有生活百貨，DAISO等
越行越興奮，呢到D價錢係香港一田呢類超市既一半再平D！仲要好新鮮😱
好多品種都係日本限定！和牛～菜～刺生等等，好想買晒走🙉🙈

可能專心揀食物既女人表現出照顧好家庭既決心，實在太迷人
令李先生忍唔住偷拍🙊
題外話：呢個係"洋蔥式"穿搭😆😁

回程就好快就望見家鄉了，永遠都係咁架！

拎返locker入面件行李後，就係車站外面既的士站上車，上一上山過埋條橋，10分鐘唔使既車程，盛為1250yen😅 不過日本的士司機既service好好就真既😆

呢到就係我地會住2晚既民宿Brick House, 紅磚外牆既設計, 屋內全木搭建

已經經營左好幾年，但完全係新既一樣，保養得好好啊

原因係民宿老闆係愛整潔之人，亦會要求客人將垃圾分類的
而我地去得人地既地方，都好應該入鄉隨俗遵守返規矩，用左既野要執返乾淨比人先係呀！😊

老闆好細心講解點樣用屋內每件設施，又熱心地比各種資訊單張我地，
仲幫我地打電話問滑雪學校Furano Snow School關於第2日既training course詳情
（我一個月前email問過一次，但太忙所以又無左一回事，都唔知前一日報會唔會無晒位😅
其實我地去旅行既心態一向順其自然，唔會執著去唔到咩景點或者做唔到咩活動，
有時咁先有驚喜架嘛～呢個trip有不少啊😊
乜都計劃好晒，如果錯過左可能會失望

.........不過我都係咁意打左份excel + print埋A3 size既itinerary既.職業病😌😂）

好彩係有位，但就要過富良野區個邊上堂，而老闆話可以一早車我地過去，每程800yen，
好感激佢啊，好過搭的士，call都未必有😂

之後我地又去左6分鐘路程距離既7-11入左一大堆飲品同零食，由於心情太放鬆了，
我情不自禁係鋪滿雪既山路跑跑跳跳，當自己滑緊雪，傻左😁😁

返到去恰左陣，醒左就享用自家製shabushabu，晒個冷先